उपराष्ट्रपति परमानन्द झाको निवासमा बम विस्फोटन गर्ने जिम्मेवारी राष्ट्रिय मुक्ति सेनाले लिएको छ ।
मुक्ति सेनाका विज्ञानका नामबाट प्रेषित विज्ञप्तिका अनुसार भारतीय विस्तारवाद विरुद्ध सशस्त्र आन्दोलन गर्दै आएको यस राष्ट्रिय मुक्ति सेना नेपालले विस्तारवादी भारतीय 'रअ' का एजेन्टहरुमाथि 'ठोस परिस्थितिमा ठोस कारवाही' अन्तर्गत राष्ट्रिय भाषा र मातृभाषालाई छोडेर विदेशीलाई खुशी पार्न हिन्दी भाषामा शपथ खाने परमानन्द झामाथि भौतिक कारवाही गरेको उल्लेख छ ।
विज्ञप्तिमामा यसअघि यस संगठनले पटक पटक आत्मालोचना गरेर नेपाली जनतासामू माफी माग्न तथा विस्तारवादी रअको एजेन्ट त्यागेको सार्वजनिक घोषणा गर्न गरेको आग्रह र अल्टिमेटमलाई वेवास्ता गर्दै उल्टै जनतामाथि चलखेल जारी राखेकोले हामी भौतिक कारवाहीको लागि बाध्य भएको कुरा विज्ञप्तिमार्फत जनाइएको छ । हामी नेपाललाई वैदेशिक हस्तक्षेप बिनाको स्वतन्त्र मुलुक र जनताले निर्णय अन्तिम हुने सार्वभौम सत्ता सम्पन्न मुलुक बनाउन चाहन्छौं । नेपाल र नेपालीको अस्तित्व रक्षाको लागि जतिसुकै बलिदानी गर्न पनि तयार रहेको यस संगठनले आगामी दिनमा कुनै पनि नेपालीलाई भारतीय रअको एजेन्ट नबन्न र बनेको भएमा यथासक्य चाँडो सार्वजनिक रुपमा त्याग गरेको घोषणा गर्न समेत विज्ञप्तिमार्फत आग्रह गरिएको छ ।
विज्ञप्तिमा हामी नेपाल र नेपालीविरुद्ध कुनै प्रकारको युद्ध गर्ने लक्ष्य बोकेको संगठन भई विशुद्ध सार्वभौम नेपालमाथि विभिन्न प्रकारका हस्तक्षेपहरु जारी राखी दिल्लीबाट चल्ने रिमोटको अन्त्य गर्न चाहन्छौं । नेपाली जनताले दुइ सय ४० वर्षे निरंकुश तानाशाही शाह वंशीय राजतन्त्रको अन्त्य गरेर संघीय लोकतान्त्रिक गणतन्त्र स्थापना गरेका छन् । तर यो कलिलो गणतन्त्रलाई भुटानीकरण हुँदै सिक्किमीकरण गर्ने अभियानमा यतिखेर विस्तारवाद लागि परेको छ ।
विज्ञप्तिमा आफ्नो स्वाभिमान, राष्ट्रियताको रक्षाको लागि नेपालबाट रअको संगठन ध्वस्त पार्न चाहन्छौं भन्दै विदेशीको बुइ चढेर नेपाल र नेपालीमाथ घात गर्ने जो कोहीलाई पनि नेपाली भएर बाँच्ने अधिकार छैन भन्ने आफ्नो संगठनको ठहर रहेको विज्ञप्तिमा उल्लेख छ । राजनीतिक दलको आडमा विस्तारवादका एजेन्ट बन्दै नेपालको सत्ताको साँचो दिल्लीमा सुम्पनेहरुलाई फेरि पनि एक पटक हामी आग्रह गर्दछौं कि कम्तिमा नेपाली जनताको लागि, मातृभूमिको लागि तपाईहरुले रअको एजेन्ट त्यागिदिनुस् ।
हाम्रो यस राष्ट्रिय मुक्ति युद्धमा स्वाभिमानी नेपाली जनताले साथ दिन समेत सम्पूर्ण देशभक्त नेपालीहरुलाई आग्रह गरिएको छ ।